فرەژنیی پێغەمبەری ئیسلام و تانەوتەشەری هاوچەرخانی
سه‌روه‌ر پێنجوێنی
لەم بابەتانەدا مەلاكان وەكو ئاگاییان نیە؛ بەڕەهاییش
قسە دەكەن و هەر شتێكیان بە دڵ نەبو دەڵێن شتی وا هەر بونی نیە، هەروەكو ئەوەی ئەوان
ئاگاییان لە وردودرشتی سەرچاوە ئیسلامیەكان هەبێت؛ دەڵێن: كەس لە سەردەمی پێغەمبەردا
ڕەخنەی لـێ نەگرتوە و تەعلیقی لـێ نەداوە لەسەر ئەوەی ژنی زۆری هەبوە، ئەوان دەڵێن
"دوژمنەكانی لە جولەكە و لە مونافیقەكان هەمو جۆرە قسەیەكیان پێ وتوە بەڵام كەسیان
لەسەر زۆریی خوازبێنی و زەماوەندەكانی ڕەخنەیان لـی نەگرتوە" و گوایە "ئەمە
نیشانەیە بۆ ئەوەی كە ئەو كاتە و لەو كۆمەڵگایەدا فرەژنی و ژنهێنانی زۆر یان كۆكردنەوەی
ژنی جوان زۆر ئاسایی بوە و مایەی ڕەخنە نەبوە".. ئینجا دەڵێن تەنها لەم سەردەمەدا
و لای خۆرهەڵاتناسەكان ئەم جۆرە ڕەخنەیە لە فرەژنیی پێغەمبەر پەیدا بوە. لێرەدا وا
دێتە پێش چاو مەلاكان هەمو دەق و سەرچاوە ئیسلامیەكانیان تاووتوێ كردبێت و هیچ نوكەقسەیەكیان
لەو بارەیەوە دەست نەكەوتبێت (كە دڵنیام بۆ فڕێدانی ئەو قسانە تەماشای هیچ سەرچاوەیەك
ناكەن و لەخۆیانەوە ڕمڵیان لـێ دەدەن، تومەز مێشكی خۆیان هەڵدەپشكنن شتی وای تێدا
نیە ئیتر دەڵێن شتی وا بونی نیە!).
منیش كە هەمو دەق و سەرچاوەكانم لایە بۆیان دەسەلمێنم
كە دۆست و دوژمن لەسەر فرەژنی و كۆكردنەوەی ژنی جوان ڕەخنەیان لـێ گرتوە و تەعلیقیان
لـێ داوە:
دۆستەكە عائیشەیە كە تەمەنی كەم بوە و نازدار بوە
لای پێغەمبەر و ئەو جۆرە قسانەی داوە بە ڕویدا:
ئەو كاتەی ـ بەپێی سەرچاوە ئیسلامیەكان ـ كە ژنێكی
موسوڵمانی مەككەیی بەناوی (خەولەی كچی حەكیم) خۆی بەخشی بە پێغەمبەر (واتە ئامادە بو
بەبێ مارەیی شوی پێ بكات) (هەندێك دەڵێن چەند ژنێك بون و خەولە یەكێكیان بوە)؛ عائیشە
ئەو حاڵەتەی پێ عەیب بو و وتی "دەكرێت ژنێك خۆی ببەخشێت؟!" و دیارە عائیشە
پێیشی ناخۆش بوە بەو ئاسانیە ژنێكی تریشی بەسەردا بێت، ئیتر ئەو ئایەتە دابەزی(!) كە
دەڵێت: (وامرأة مؤمنة إن وهبت نفسَها للنبي إن أراد النبي أن يستنكحها خالصةً لك من
دون المؤمنين... تُرْجي مَن تشاء منهن وتُؤْوي إليك مَن تشاء..) (الأحزاب: 50 ـ
51)، كە باسی ئەو حاڵەتە دەكات و بۆ پێغەمبەری حەڵاڵ دەكات.. ئیتر عائیشە كە ئەمەی
بینی بە پێغەمبەری وت (ئەوەی دەیبینم ئەوەیە كە خوا بۆ [بەدیهێنانی] ئارەزوی تۆ خێرایە)
یان (بەدەست‌وبردە) (ما أرى ربَّك إلا يُسارع في هواك)!! (بوخاری، كیتابی تەفسیر، سورەتی
ئەحزاب، بابی ئایەتی (ترجي من تشاء منهن..)، حەدیسی ژمارە 4788. هەروەها موسلیم و نەسائی
و ئەبو داوود و ئیبن ماجە و كەسانی تر ڕیوایەتیان كردوە. حەدیسەكە بەپێی مەرجی بوخاری
و موسلیم صەحیحە، ئەلبانی گێڕانەوەكەی ئیبن ماجەیش بە صەحیح دادەنێت)، مەبەستی ئەوەیە
ئەو شتەی كە پێغەمبەر دەیەوێت و ئارەزوی دەكات یەكسەر ئایەتی لەسەر دادەبەزێت! (بێ
گومان ئەمە تاكە نمونەی ئەم حاڵەتە نیە: كاتێكیش ویستی زەینەب بۆ زەیدی كۆنە كۆیلە
بخوازێت و زەینەب و عەبدوڵڵای برای پێیان ناخۆش بو؛ ئایەت دابەزی و وتی موسوڵمان نابێت
بەرامبەر بڕیاری خوا و پێغەمبەر خۆیان بە سەرپشك بزانن و وا بزانن توانای ڕەتكردنەوە
و هەڵبژاردنیان هەیە! (الأحزاب: 36)، دواییش كە ویستی زەینەب مارە بكاتەوە و لەسەر
ئەوە ڕەخنەیان لـێ گرت كە چۆن ژنی بەكوڕكراوی خۆی مارە دەكات، دیسان ئایەت دابەزی
و فریای قەیرانەكە كەوت (الأحزاب: 37 ـ 40). بەڵكو لە زەماوەندەكەی زەینەبدا كۆمەڵێك
كەس دوای نانخواردن خەریكی قسە بون و درەنگ هەستان و درەنگ چۆڵیان كرد، لەسەر ئەوەش
ئایەت دابەزی! (وإذا طعمتم فانتشروا، ولا مستأنسين لحديث..) (الأحزاب: 53).
ـ ئەمە لە قسەی دۆست.. لە قسەی دوژمنیش، ئاساییە
كە قسەوباسێكی ئەوتۆی (مونافیقەكان) مان پێ نەگات، چونكە بە ئاشكرا هیچی ئەوتۆیان
نەوتوە (جگە لە هەندێك قسەی عەبدوڵڵای كوڕی ئوبەیی كوڕی سەلول) و دواییش نەماون و هەرچییشیان
وتبێت نەگەیشتوە، بەڵام نمونە بە قسەی جولەكەی مەدینە دەهێنینەوە: جولەكەكان كە دەیانبینی
پێغەمبەر زۆر بایەخ دەدات بە ژنخواستن و زەماوەند و ناردن بۆ ژنی جوان، پێیان وابو
ئەوە لەگەڵ فرمانی پێغەمبەرایەتی و ڕابەرایەتیی ڕۆحی ناگونجێت، بۆیە ـ بەپێی سەرچاوە
ئیسلامیەكان ـ وتیان: (ئەم پیاوە هیچ مەراق و مەبەستێكی نیە جگە لە ژن و ژنهێنان، ئەگەر
پێغەمبەر بوایە پێغەمبەرایەتی سەرقاڵی دەكرد و ئەوەندە بایەخی بە ژن نەدەدا) (ما ترى
لهذا الرجل همة إلا النساء والنكاح، ولو كان نبياً كما زعم لشغله أمر النبوة عن النساء)،
ئەمە بەپێی گێڕانەوەی (الكلبي) كە ـ بۆ نمونە ـ (قورطوبی) یش دواتر دەیگێڕێتەوە، بەپێی گێڕانەوەی
(أبو حمزة الثمالي) یش وتویانە: (تەماشا ئەم پێغەمبەرە! نە لە خواردن تێر دەخوات نە
هیچ مەراقێكی هەیە جگە لە ژن، ئەگەر پێغەمبەر بوایە بەهۆی پێغەمبەرایەتیەوە نەیدەپەرژایە
سەر مەسەلەی ژن)، ئیتر گێڕانەوەكە دەڵێت (لەسەر زۆریی ژنەكانی ئێرەییان پێ بردوە و
كردویانە بە عەیبەیەك بەسەریەوە). بەپێی گێڕانەوەكان و تەفسیرەكان دو ئایەت بۆ وەڵامی
ئەو تانە‌وتەشەرەی جولەكە دابەزیون: یەكەمیان: (ولقد أرسلنا رسلا من قبلك وجعلنا لهم
أزواجا وذرية) (الرعد: 38) كە دەڵێت هەمو پێغەمبەرێك ژن و منداڵی هەبوە، دوەمیان:
(أم يحسدون الناس على ما آتاهم من فضله، فقد آتينا آل إبراهيم الكتاب والحكمة وآتيناهم
ملكا عظيما) (النساء: 54)، كە ئاماژە دەدات بەو ئێرەیی (حسد) ەی ئەوان و دەڵێت پێغەمبەرانی
نەوەی ئیبراهیمیش لەگەڵ پێغەمبەرایەتیدا دارایی و دنیای باشیان هەبوە، وەكو ئاماژەیەك
بۆ ئەو هەمو ژنە زۆرەی داوود و سولەیمان كە بەپێی نوسینە یەهودیەكان هەیانبوە. بێ
گومان بیروڕای تریش هەیە دەربارەی مانای ئەم دو ئایەتە، بەڵام ئەم لێكدانەوەیە ئەگەری
زیاتری هەیە و گێڕانەوەكان پشتگیریی دەكەن.
دەربارەی ئەو گێڕانەوەیە و ئەم دو ئایەتە، بۆ نمونە
بڕوانە: الطبري، جامع البيان في تأويل القرآن. تحقيق: أحمد محمد شاكر. مؤسسة الرسالة،
ط1، 2000. جـ. 8، ص. 479: هەردو گێڕانەوەی ژمارە 9824 و 9825. هەروەها: القرطبي، الجامع
لأحكام القرآن. تحقيق: هشام سمير البخاري. دار عالم الكتب، الرياض. جـ. 1، ص. 327.
أبو حيان، البحر المحيط. تحقيق: عادل أحمد عبد الموجود، علي محمد معوض. دار الكتب العلمية،
بيروت، ط1، 2001. جـ. 5، ص. 387. النيسابوري، غرائب القرآن ورغائب الفرقان. تحقيق:
زكريا عميران. دار الكتب العلمية، بيروت، ط1، 1996. جـ. 4، ص. 164. هەروەها بڕوانە:
ابن سعد، الطبقات الكبرى. تحقيق: إحسان عباس. دار صادر، بيروت، ط1، 1968. جـ. 8، ص.
202.
ئەو قسەیەی مەلاكان كە دەڵێن شتی وا نیە ڕەخنە لە
پێغەمبەر گیرابێت لە سەردەمی خۆیدا لەسەر فرەژنی، بەڵگەیە لەسەر ئەوەی ئاگاییان نیە
لە هەر سێ ئایەتی (وامرأة مؤمنة إن وهبت نفسَها للنبي..) (الأحزاب: 50 ـ 51) و (ولقد أرسلنا رسلا من قبلك وجعلنا لهم أزواجا
وذرية) (الرعد: 38) و (أم يحسدون الناس..) (النساء: 54) و نازانن مانا و (هۆكاری هاتنەخوارەوە)
یان چیە! جا كەواتە ئەمانە چۆن بە خۆیان دەڵێن (زانا)؟! دیارە وشەی (زانا) لێرەدا واتای
خۆی لە دەست داوە!
بێ گومان ئەم بابەتانە دەربارەی (ژیانی تایبەتیی
پێغەمبەری ئیسلام) لە خۆیاندا هیچ بۆ ئێمە گرنگ نین، بەڵام لەبەر ئەوەی ئەو كەسێتیە
بوەتە ماددەیەك بۆ باوەڕی هەزاران و میلیۆنان كەس و لە كولتوری كوردییشدا هەر وایە،
لەبەر ئەوە ئێمە ناچارین وردودرشتی ژیاننامەی ئەو كەسێتیە تاووتوێ بكەین، بەتایبەتی
كە دەبینین مەلاكان و ئیسلامیەكان زۆربەی شتەكان دەشارنەوە و هیچ نەبێت ئەو شتانەی
لە سەرچاوە ئیسلامیەكانیشدا هاتون بۆ خەڵكی باس ناكەن و پەردەپۆشیان دەكەن ئەگەر مایەی
سەرسوڕمان و گومان و ئیحراجبون بن و بەڵگەیەك بن لەسەر (مێژوییبون) و (قۆناغەكیبون)
و (سروشتیبون) ی ئیسلام. لەبریی مێژو و ڕوداوەكان مەلاكان و ئیسلامیەكان هەر كۆمەڵێك
بیروباوەڕ و پیرۆزی و عەجائیبات دەربارەی ئەو كەسێتیە باس دەكەن. ئەمە بۆ خۆی فێڵێكی
سوكە كە لە خەڵكی دەكەن.. مرۆڤ دەبێت هەمو شتێك بزانێت، نابێت هیچ شتێك لە خەڵك بشاردرێتەوە..
هەزار ساڵیش بشاردرێتەوە دواتر هەر دەردەكەوێت.. گەلێك شت هەن لە كولتوری گەلانی موسوڵماندا
كە بە هەڵواسراوی ماونەتەوە و خەڵك بەگشتی ناوێرن ئازایانە ڕوبەڕویان ببنەوە، بۆیە
هەر بە چرپە و بەنهێنی و بە ترس و لەرزەوە باسیان لـێ دەكرێت، یان كەسانێك یاخی دەبن
و هەندێكیشیان ئاشكراكردنی مەسەلەكان بۆ بەرژەوەندیی خۆیان بەكار دەهێنن و كورد وتەنی
"نان‌وپیوازی پێوە دەخۆن"! بەڵام ئەگەر موسوڵمان بۆ خۆی ڕوبەڕوی كێشە و مەتەڵەكانی
ئیسلام ببێتەوە و ئازایانە ئەوەی ڕاستیە دانی پێدا بنێت، ئەو كاتە بوارێك نامێنێتەوە
بۆ مرۆڤی ئەورۆپایی كە ڕقێكی لەمێژینەی لە ئیسلام و عەرەب هەیە بێت ئەوەی موسوڵمان
نایكات ئەو ئەنجامی بدات و هەندێك جار شتی تریشی پێوە بنێت، یان كەسانێك لەناو گەلانی
موسوڵماندا خۆیان توشی مەترسیی كوشتن و وەدەرنان بكەن بۆ وتنی هەندێك ڕاستی و هەندێكیشیان
هەندێك جار ئەو وتنە بۆ بەرژەوەندییەك بەكار بهێنن. بێ گومانم كە موسوڵمانانیش هەروەكو
مەسیحیەكانی ئەورۆپا لە داهاتویەكی دور یان نزیكدا ناچار دەبن دەرگا بۆ ئەو توێژینەوە
ڕەخنەییانە ئاوەڵا بكەن و خۆیشیان دان بە زۆر شتدا بنێن..
